收看節目
瀏覽人次:57100次

收看節目 收聽節目 下載

節目名:容祖兒榮升大姑奶 細佬成家立室好感動

主持 : Bread-TV 家族

內容:樂壇天后容祖兒(Joey)細佬小登科,Joey榮升大姑奶,不過尋日除咗係細佬Big Day外,原來都係祖兒農曆生日,認真雙喜臨門!佢只係簡簡單單咁許咗個願身體健康。Joey忙咗成日但似乎都意猶未盡,將場內片段放上社交網同大家分享佢嘅喜悅,見Joey喺場內興奮轉圈,唔知以為佢結婚添,佢又多謝關智斌(Kenny)放工趕到幫手迷倒場內少女,而都有拍低一對新人讀誓言時的甜蜜場面。 講到榮升大姑奶的心情,她說:「多咗一個特別嘅身份唔識點形容,今晚參加個Party,成個婚禮都係由細佬佢哋一手一腳策劃,佢話唔使我幫手,佢成熟處理得好妥當,我尋晚心情都冇話特別激動,不過就開心,呢個小朋友我由細睇到佢大,到佢今日成家立室,覺得好感動,佢終於大個仔,好大嘅高興,佢可以搵到一個人生嘅伴侶。」問到斟茶時可有感動到喊?她說:「有啊,大妗姐叫我講祝福說話,我就同細佬講要互相愛護、互相照顧,我都冇講啲乜但已經有啲眼淚,就係血濃於水嘅感覺。(唔捨得?)又唔會,係多咗個屋企人,佢會令家庭愈嚟愈強大,最好有咁大得咁大。」她又謂媽咪都很開心:「最開心佢哋搵到一個人互相照顧,媽咪又放心。」提到之前已送了樓給細佬的她,問再有送咩畀細佬?她說:「酒席,同埋細個已經送咗隻錶畀佢,叫佢第時結婚戴,今日佢就戴咗。」 她表示今晚筵開20多席:「唔算好多,但由細嘅場地轉去大嘅場地,本身諗住簡單啲,但唔掂,所以去大啲。」她透露好姊妹Twins不在香港,關智斌剛收工趕來,公司同事都有來,因他們由細睇住細佬大,及一些親戚朋友。問可會上台唱歌?她說:「冇呀,我迫細佬表演佢唔肯,佢話好大壓力,我覺得我今日唔出聲好啲,靜心感受婚禮喜悅。」問到可會不醉無歸?她說:「一滴不沾,因為啱啱好番,我唔使飲酒都可以好High㗎。」